దుబాయ్: వాహన బీమా పాలసీని రెన్యువల్ చేయడం లేదా కొత్త బీమా తీసుకునే సమయంలో ప్రజలను లక్ష్యంగా చేసుకుని జరుగుతున్న ఆన్‌లైన్ మోసాలపై దుబాయ్ పోలీసులు హెచ్చరించారు. బీమా కంపెనీలు, గుర్తింపు పొందిన సంస్థలు, బ్రోకర్ల పేరుతో నకిలీ ప్రకటనలు, లింకులు, సోషల్ మీడియా ఖాతాలను సృష్టించి మోసగాళ్లు ప్రజల నుంచి డబ్బులు, వ్యక్తిగత వివరాలు, బ్యాంకింగ్ సమాచారాన్ని దొంగిలిస్తున్నారని దుబాయ్ పోలీసుల జనరల్ డిపార్ట్‌మెంట్ ఆఫ్ క్రిమినల్ ఇన్వెస్టిగేషన్‌లోని యాంటీ-ఫ్రాడ్ సెంటర్ తెలిపింది.

ముఖ్యంగా సాధారణ ధర కంటే చాలా తక్కువగా బీమా ఆఫర్లు ఇస్తున్నట్లు చూపించడం, పాలసీ వెంటనే రెన్యువల్ చేసుకోవాలంటూ అత్యవసర సందేశాలు పంపడం వంటి పద్ధతులను మోసగాళ్లు ఉపయోగిస్తున్నారని అధికారులు తెలిపారు. అనంతరం లింక్‌పై క్లిక్ చేయించి వాహన వివరాలు, వ్యక్తిగత సమాచారం, బ్యాంక్ కార్డు వివరాలు లేదా వెరిఫికేషన్ కోడ్‌లను నమోదు చేయాలని కోరుతున్నారని వివరించారు.

ఏదైనా నగదు బదిలీ చేసే ముందు డబ్బు అందుకునే వ్యక్తి లేదా సంస్థ వివరాలను తప్పనిసరిగా ధృవీకరించాలని దుబాయ్ పోలీసులు సూచించారు.

దుబాయ్ పోలీసుల 10 సూచనలు

1. బీమా కంపెనీని ధృవీకరించండి:
డబ్బు బదిలీ చేసే ముందు బీమా కంపెనీ పేరు, అది లైసెన్స్ పొందిన మరియు అధికారికంగా గుర్తింపు పొందిన సంస్థేనా అనే విషయాన్ని నిర్ధారించుకోవాలి.

2. బ్యాంక్ ఖాతాను పరిశీలించండి:
డబ్బు పంపే బ్యాంక్ ఖాతా బీమా కంపెనీకి చెందినదై ఉండాలి. వ్యక్తిగత ఖాతాలకు లేదా సంబంధం లేని సంస్థల ఖాతాలకు డబ్బు పంపకూడదు.

3. సోషల్ మీడియా ప్రకటనలను నమ్మే ముందు జాగ్రత్త:
సోషల్ మీడియాలో వచ్చే ప్రకటనలు, సందేశాలను ధృవీకరణ లేకుండా నమ్మకూడదు. ప్రకటనదారు, వారి అధికారిక వివరాలను ముందుగా పరిశీలించాలి.

4. పాలసీ వివరాలను పరిశీలించండి:
ఇన్సూరెన్స్ పాలసీలోని కంపెనీ పేరు, బ్రోకర్ వివరాలు, ఇతర సమాచారం అధికారిక సంస్థల వివరాలతో సరిపోతున్నాయో లేదో తనిఖీ చేయాలి.

5. తెలియని లింకులపై క్లిక్ చేయొద్దు:
బీమా ఆఫర్ లేదా వాహన బీమా రెన్యువల్ పేరుతో తెలియని వ్యక్తులు పంపిన లింకులను తెరవకూడదు.

6. అసాధారణంగా తక్కువ ధరలపై అప్రమత్తంగా ఉండండి:
సాధారణ మార్కెట్ ధరల కంటే చాలా తక్కువగా ఉన్న బీమా ఆఫర్లను చూసి ఆకర్షితులు కావద్దని పోలీసులు సూచించారు. ఇవి మోసానికి ఎరగా ఉండవచ్చని హెచ్చరించారు.

7. బ్యాంకింగ్ వివరాలు పంచుకోవద్దు:
బ్యాంక్ కార్డు వివరాలు, పాస్‌వర్డ్‌లు, వెరిఫికేషన్ కోడ్‌లు (OTP వంటి వాటిని) బీమా కంపెనీ ప్రతినిధులమని చెప్పుకునే వారికి కూడా పంపకూడదు.

8. అధికారిక మార్గాల్లోనే సంప్రదించండి:
ఆఫర్ లేదా చెల్లింపు అభ్యర్థన నిజమైనదేనా అని నిర్ధారించుకునేందుకు సంబంధిత బీమా కంపెనీని వారి అధికారిక ఫోన్ నంబర్ లేదా ఇతర అధికారిక ఛానళ్ల ద్వారా సంప్రదించాలి.

9. రసీదులు, సందేశాలను భద్రపరచండి:
డబ్బు బదిలీ రసీదులు, సంబంధిత సందేశాలు, బీమా ఆఫర్లకు సంబంధించిన వివరాలను భద్రంగా ఉంచుకోవాలి. అవసరమైనప్పుడు ఫిర్యాదు చేసేందుకు ఇవి ఉపయోగపడతాయి.

10. మోసం అనుమానం వస్తే వెంటనే చర్యలు తీసుకోండి:
మోసం జరిగినట్లు లేదా అనుమానాస్పద లావాదేవీ జరిగినట్లు భావిస్తే మరిన్ని డబ్బులు పంపకూడదు. వెంటనే బ్యాంకును, సంబంధిత అధికారులను సంప్రదించి ఫిర్యాదు చేయాలని దుబాయ్ పోలీసులు సూచించారు.