15సార్లు ప్రపంచ స్నూకర్‌ ఛాంపియన్‌ అయిన భారత క్రీడాకారుడు పంకజ్‌ అద్వాణీ సాంగ్‌సమ్‌ 6 రెడ్‌ వరల్డ్‌ ఛాంపియన్‌షిప్‌లో ప్రీ క్వార్టర్స్‌కి దూసుకెళ్లాడు. గ్రూప్‌ దశలో వరుసగా డోమినిక్‌ డేల్‌(యూకే), రాబర్ట్‌ మికిన్స్‌(ఇంగ్లండ్‌), రైన్‌ తోమర్‌సన్‌(ఆస్ట్రేలియా), పైటూన్‌ పోన్‌బన్‌(థాయ్‌లాండ్‌) క్రీడాకారులపై విజయం సాధించాడు. ఒకానొక దశలో జర్మనీకి చెందిన క్రీడాకారుడు లూకస్‌ క్లికర్స్‌పై 6-0 తేడాతో విజయం సాధించాడు. ఈ టోర్నీలో చైనా క్రీడాకారుల నుంచి పలువురికి గట్టి పోటీ ఎదురవుతోంది. అద్వాణీ ప్రీ క్వార్టర్స్‌లో చైనా క్రీడాకారుడు యూన్‌ సిజున్‌తో తలపడనున్నాడు.ఈ సందర్భంగా అద్వాణీ మాట్లాడుతూ.. ప్రీ క్వార్టర్స్‌కు దూసుకెళ్లడం చాలా సంతోషంగా ఉందని, ఇక్కడి పరిస్థితులు అనుకూలంగా ఉన్నాయని తెలిపారు.