మనామా: దుండగులు రెండు గ్యాస్‌ సిలెండర్లను బిలాద్‌ అల్‌ కదీమ్‌ గ్రామంలో పేల్చిన ఘటన తీవ్ర భయాందోళనల్ని కలిగించింది. క్యాపిటల్‌ గవర్నరేట్‌ పరిధిలోని ఓ స్కూల్‌ వద్ద ఈ పేలుళ్ళు సంభవించాయి. అయితే ఈ పేలుళ్ళలో ఎవరూ గాయపడలేదు. ఎడ్యుకేషన్‌ మినిస్ట్రీ ఈ వివరాల్ని ధృవీకరిస్తూ ఓ ప్రకటన విడుదల చేసింది. స్కూల్‌ గోడను ఈ పేలుళ్ళు ధ్వంసం చేశాయనీ, అదృస్టవశాత్తూ ఎవరికీ ఎలాంటి హానీ జరగలేదని ఆ ప్రకటనలో పేర్కొన్నారు. స్కూల్‌ భద్రతా సిబ్బంది తక్షణం స్పందించి, మంటల్ని ఆర్పి వేశారని, తీవ్రవాదుల ఘాతుకాన్ని ఖండిస్తున్నట్లు మంత్రిత్వ శాఖ పేర్కొంది. కొద్ది రోజుల్లో కొత్త విద్యా సంవత్సరం ప్రారంభం కానున్న నేపథ్యంలో ఈ దాడులు అత్యంత హేయమని మంత్రిత్వ శాఖ వ్యాఖ్యానించింది.