'రంగం' వంటి సూపర్‌హిట్‌ సినిమా ద్వారా తెలుగు ప్రేక్షకులకు దగ్గరైన తమిళ నటుడు జీవా నటిస్తున్న తాజా చిత్రం 'కవలై వేండాం'. ఇందులో కాజల్‌ నాయికగా నటిస్తోంది. 'యామిరుక్క బయమేన్‌' ఫేమ్‌ డీకే దర్శకుడు. ఈ చిత్రం షూటింగ్‌ పూర్తిచేసుకుని, పోస్ట్‌ ప్రొడక్షన్‌ పనులు జరుపుకుంటోంది. తమిళంలో భారీ వ్యయంతో తీస్తున్న ఈ చిత్రం తెలుగు హక్కులను డి.వి.

సినీ క్రియేషన్స్‌ అధినేత డి.వెంకటేష్‌ సొంతం చేసుకున్నారు. ఇందుకోసం ఆయన భారీమొత్తం చెల్లించారు. డి.వెంకటేష్‌ మాట్లాడుతూ "రంగం' చిత్రం తెలుగులో ఎంతటి విజయాన్ని సాధించిందో అందరికీ తెలిసిందే. అందులో హీరోగా నటించిన జీవా, అగ్ర నాయిక కాజల్‌ కలిసి నటించిన చిత్రం అంటే అంచనాలు భారీగా ఉంటాయి.

ఇటీవలే విడుదల చేసిన ఈ సినిమా ట్రైలర్‌ సైతం ఆకట్టుకుంది. అంచనాలు పెంచింది. ఈ చిత్రాన్ని తెలుగులో అనువదించాలనే ఉద్దేశంతో ఫ్యాన్సీ రేట్‌ ఇచ్చి తీసుకోవడం జరిగింది. త్వరలోనే తెలుగు టైటిల్‌ ప్రకటిస్తాం.

మిగతా కార్యక్రమాలు పూర్తిచేసి విడుదల తేదీని ప్రకటిస్తాం. 'రంగం' చిత్రాన్ని తమిళంలో నిర్మించిన ఎల్రెడ్‌ కుమార్‌ ఈ సినిమాను కూడా తమిళంలో తీయడం విశేషం అని చెప్పారు. జీవా, కాజల్‌ జంటగా నటిస్తున్న ఈ చిత్రంలో బాబీ సింహా, శ్రుతి రామకృష్ణన్‌, సునయన, మంత్ర తదితరులు ఇతర పాత్రధారులు.