అమెరికాలోని కాలిఫోర్నియాలో జరిగిన ఘోర రోడ్డుప్రమాదంలో 13 మంది మృతిచెందగా.. 31 మంది గాయపడ్డారు.పర్యాటకులతో వెళ్తున్న బస్సు ఆదివారం రాత్రి అదుపుతప్పి ట్రాక్టరును ఢీకొనడంతో ఈ ఘటన చోటుచేసుకుంది. పోలీసుల కథనం ప్రకారం..ఉత్తర కాలిఫోర్నియా నుంచి లాస్‌ఏంజిల్స్‌ వైపు ప్రయాణిస్తున్న పర్యటకుల బస్సు పామ్‌ స్ప్రింగ్స్‌ వద్దకు రాగానే అదుపుతప్పి ట్రాక్టర్‌పైకి దూసుకెళ్లింది. ఈ ఘటనలో బస్సు డ్రైవర్‌ సహా 13మంది అక్కడిక్కడే మృతిచెందగా మరో 31మంది గాయాలపాలయ్యారుసమాచారం అందుకున్న పోలీసులు వెంటనే ఘటనాస్థలానికి చేరుకుని క్షతగాత్రులను ఆస్పత్రికి తరలించారు. వీరిలో పలువురి పరిస్థితి విషమంగా ఉన్నట్లు వైద్యులు వెల్లడించారు. మరోవైపు ప్రమాదానికి కారణం అతివేగమా? లేక డ్రైవర్‌ మద్యం సేవించడమా? అన్న కోణంలో దర్యాప్తు చేపట్టినట్లు పోలీసులు తెలిపారు.