మధ్యదరా సముద్రంలోని మాల్టా దీవిలో విమానం కూలిన ఘటనలో ఐదుగురు మృతిచెందారు. విమానాశ్రయ అధికారులు తెలిపిన వివరాల ప్రకారం....సోమవారం అక్రమ వలసదారులను గుర్తించేందుకు లిబియాకు బయలుదేరిన విమానం టేకాఫ్‌ తీసుకునే క్రమంలో రన్‌వేపై పేలిపోయింది. ఈ ఘటనలో విమానంలో ప్రయాణిస్తున్న ఐదుగురు ఫ్రెంచ్‌ సిబ్బంది అక్కడిక్కడే మృతిచెందారు. లుక్వా ఎయిర్‌పోర్ట్‌లో ఈ ఘటన చోటుచేసుకున్నది. విమానం పేలిన అనంతరం మాల్టా ఎయిర్‌పోర్ట్‌ను తాత్కాలికంగా మూసివేశారు. ఘటనపై దర్యాప్తు చేపట్టినట్టు అధికారులు తెలిపారు.