రష్యా భద్రతా బలగాలు జరిపిన వైమానిక దాడుల్లో ముగ్గురు అల్‌ఖైదా ఉగ్రసంస్థ కీలక కమాండర్స్‌ హతమయ్యారు. ఈ విషయాన్ని రష్యా రక్షణశాఖ అధికార ప్రతినిధి ఐగర్‌ కోనషెంకేవ్‌ ధ్రువీకరించారు. అలెప్పోలో భారీ విధ్వంసాలకు పాల్పడేందుకు ఉగ్రవాదులు కుట్ర పన్నినట్టు అందిన విశ్వసనీయమైన సమాచారం మేరకు వైమానిక దాడులు నిర్వహించామని చెప్పారు. గురువారం ఇద్లిబ్‌లోని ఉగ్రవాద శిబిరాలను లక్ష్యంగా చేసుకొని అడ్మైరల్‌ కుజ్‌నేత్సోవ్‌ వైమానిక స్థావరం నుంచి ఎస్‌యూ-33 యుద్ధవిమానంతో దాడులు నిర్వహించినట్టు తెలిపారు. ఈ దాడుల్లో ఐఎస్‌ కమాండర్స్‌ మొహ్మద్‌ హెలాలా, అబూ జాబెర్‌ హర్మూజా, అబుల్‌ బాహా అల్‌-సఫారీలతో మరో 30 మంది ఉగ్రవాదులు కూడా మృతిచెందినట్టు కోనషెంకేవ్‌ చెప్పారు.ఇదిలా ఉండగా, ఇద్లిబ్‌, హామ్స్‌ నగరాల్లో ఇటీవలి కాలంలో ఐఎస్‌ కార్యకలాపాలు శృతిమించాయి. తాజాగా ఆత్మాహుతి దాడులకు పాల్పడి మారణహోమం సృష్టించేందుకు ఉగ్రవాదులు పన్నిన కుట్రను రష్యా బలగాలు భగం చేశాయి.