అమెరికా గూఢచార సంస్థ సిఐఎ, స్పెషల్‌ ఆపరేషన్‌ ఫోర్సెస్‌ సారధ్యంలో ఇస్లామిక్‌ స్టేట్‌ మిలిటెంట్‌ సంస్థపై సిరియాలో అమెరికా ద్రోణ్‌ దాడులను ప్రారంభించినట్లు మీడియా కథనాల ద్వారా తెలుస్తోంది. ఐఎస్‌ మిలిటెంట్‌ సంస్థపై విస్తృత స్థాయిలో చేపట్టిన దాడుల్లో భాగంగానే అమెరికా ఈ ద్రోణ్‌ దాడులకు తెరతీసినట్లు అమెరికా సీనియర్‌ అధికారులను ఉటంకిస్తూ వాషింగ్టన్‌ పోస్ట్‌ పత్రిక వార్తాకథనాన్ని ప్రచురించింది. సిరియాలో కొనసాగుతున్న యుద్ధంలో సిఐఎ ప్రమేయాన్ని ఈ రహస్య దాడుల కార్యక్రమం ప్రతిబింబిస్తున్నదని ఈ పత్రిక తన కథనంలో పేర్కొంది. ఉగ్రవాద అనుమానితుల్లో అత్యంత ఉన్నత స్థాయి లక్ష్యాలుగా పరిగణిస్తున్న వారిని లక్ష్యంగా చేసుకుని ఈ దాడులను అమెరికా ప్రారంభించినట్లు అధికారులు వివరించారు.