ఖతార్  లో గత సంవత్సరాలతో పోలిస్తే ఈ  జులై నెల నుండి సైకిల్ అమ్మకాలు గణనీయంగా పడిపోయాయి. ఈ సందర్భంగా ఒక స్పోర్ట్స్ మరియు సైకిల్ స్టోర్స్ సూపర్వైజర్ మాట్లాడుతూ, వేసవిలో అమ్మకాలు తగ్గడం సామాన్యమేనని, కానీ ఈసారి మరీ రోజుకు 5 కంటే తక్కువగా అమ్మకాలు జరగడం, ఎప్పుడూ లేదని వాపోయారు. దేశంలో సైకిల్ స్టోర్స్ సంఖ్య పెరగడంతో, వాటి మధ్య పోటీ పెరిగి వివిధ బ్రాండ్ల సైకిళ్లను తక్కువ రేటుకే అందించడం ఒక కారణమని ఆయన అన్నారు. ఇంకా చాలా కాలం నుండి సైక్లింగ్ చేస్తున్న వారు, తమ పాత సైకిళ్లను సోషల్ మీడియా ద్వారా అమ్మడం కూడా మరో కారణం గా కనిపిస్తోంది. మరో దుఖాన యజమాని మాట్లాడుతూ, వినియోగదారులు ఆన్ లైన్లో సైకిళ్లు కొంటున్నారనీ, వారిని ఆకర్షించడానికి తాము అనేక ప్రమోషన్ లు, ప్రత్యేక డిస్కౌంట్లు ఇస్తున్నామని, రానున్న శీతాకాలంలో తమ వ్యాపారం పుంజుకుంటుందనే ఆశాభావం వ్యక్తం చేశారు.

--వి.రాజ్ కుమార్(మాగల్ఫ్ ప్రతినిధి,ఖతార్)