తిరుపతిలో శ్రీ వేంకటేశ్వరస్వామి పాదాల చెంత నిర్వహిస్తున్న గౌతమీపుత్ర శాతకర్ణి ఆడియో ఫంక్షన్‌లో తెలంగాణ ముఖ్యమంత్రి కె.చంద్రశేఖరరావు ప్రత్యక్షమై అభిమానులను ఉర్రూతలూగించారు. ఆయన కనిపించగానే అతిథులు సహా నందమూరి అభిమానులు కేరింతలు కొట్టారు. అయితే కేసీఆర్ ప్రత్యక్షమైంది అక్కడ ఏర్పాటు చేసిన బిగ్ స్ర్కీన్‌పై కావడం గమనార్హం. ఈ సినిమా విశేషాలు గురించి చెబుతున్న యాంకర్ గతంలో ఈ సినిమా ప్రారంభోత్సవ సమయంలో కీర్తించిన ప్రముఖుల గురించి వివరించారు. ఈ సందర్భంగా అప్పటి వీడియోను అక్కడి తెరపై ప్రదర్శించారు. సీఎం కేసీఆర్ సహా టాలీవుడ్ ప్రముఖ హీరోలు బాలకృష్ణను కీర్తించారు. దీంతో కార్యక్రమంలో ఒక్కసారిగా కరతాళ ధ్వనులు వినిపించాయి.