సుమారు 150మంది బాలకళాకారులచే నిర్వహించబడిన బతుకమ్మ వైభవం నృత్యప్రదర్శన తెలుగు బుక్‌ ఆఫ్‌ రికార్డ్స్‌లో చోటు సంపాదించుకుంది. సోమవారం రవీంద్రభారతిలో బతుకమ్మ నృత్యమండలి, భాషా సాంస్కృతికశాఖ సంయుక్త ఆధ్వర్యంలో బతుకమ్మ వైభవం శీర్షికన నృత్యప్రదర్శన జరిగింది. నృత్యగురువు కల్లూరి వెంకటేశ్వర్లు, కల్లూరి నాగమణి, కిరణ్మయి, భవానీ, కిశోర్‌ తదితరుల ఆధ్వర్యంలో జరిగిన ఈ ప్రదర్శనలో చిన్నారులు అద్భుతంగా నర్తించి భళా అనిపించారు. తెలుగు బుక్‌ ఆఫ్‌రికార్డ్స్‌ వ్యవస్థాపక అధ్యక్షుడు చింతపట్ల వెంకటాచారి హాజరై తిలకించిన అనంతరం తెలుగు బుక్‌ ఆఫ్‌రికార్డులో చోటు సంపాదించినట్లు ప్రకటించారు. కార్యక్రమంలో పలువురు ప్రముఖులు హాజరై విద్యార్థులను అభినందించారు.