దుబాయ్‌లో చోటు చేసుకున్న రెండు వేర్వేరు రోడ్డు ప్రమాదాల్లో 28 మంది గాయపడ్డారు. వీరిలో నలుగురి పరిస్థితి విషమంగా ఉన్నట్లు వైద్యులు వెల్లడించారు. మొదటి రోడ్డు ప్రమాదంలో 26 మంది గాయపడగా, రెండో రోడ్డు ప్రమాదంలో ఇద్దరు గాయపడ్డారు. ఎమిరేట్స్‌ రోడ్‌లో జరిగిన రోడ్డు ప్రమాదంలో నాలుగు కార్లు ధ్వంసమయ్యాయి. ఈ ఘటనలో ముగ్గురి పరిస్థితి విషమంగా ఉంది. ఏడుగురు ఓ మోస్తరు గాయాలతో బయటపడ్డారు. మిగిలినవారికి చిన్న చిన్న గాయాలయ్యాయి. ఉదయం 6.40 నిమిషాల సమయంలో ఈ రోడ్డు ప్రమాదం చోటు చేసుకుంది. మిట్‌సుబిషి వాహనాన్ని నడుపుతున్న వ్యక్తి ఈ ప్రమాదానికి కారణమయ్యాడు. మరో రోడ్డు ప్రమాదం తెల్లవారుఝామున 5 గంటలకు జరిగింది. వాహనాన్ని అతివేగంగా నడుపుతూ ఎలక్ట్రిసిటీ పోల్‌ని ఢీకొన్నాడు డ్రైవర్‌. ఈ ఘటనలో ఇద్దరు వ్యక్తులు తీవ్రంగా గాయపడ్డారు. వారిని రసీద్‌ ఆసుపత్రికి తరలించారు. వాహనదారులు వాహనాల్ని నడిపేటప్పుడు అప్రమత్తంగా ఉండాలనీ, వేగ నియంత్రణ పాటించాలని పోలీసు అధికారులు సూచిస్తున్నారు.