మిస్టర్‌ వరల్డ్‌ టైటిల్‌ పోటీల్లో పాల్గొనేందుకు తనకు ఆర్థిక సహాయం చేయాలని బాడీ బిల్డర్‌ జి.అయ్యప్ప శాట్స్‌కు విజ్ఞప్తి చేశారు. గురువారం ఎల్బీ స్టేడియంలోని శాట్స్‌ కార్యాలయంలో చైర్మన్‌ వెంకటేశ్వర్‌రెడ్డిని కలిసిన అయ్యప్ప ఈ మేరకు కోరారు. ఏడుసార్లు మిస్టర్‌ తెలంగాణగా ఎంపికైన అయ్యప్ప 2015లో మిస్టర్‌ ఇండియా నేషనల్‌ జూనియర్స్‌ 70కిలోల విభాగంలో స్వర్ణ పతకం సాధించాడు. ఈ ఏడాది జాతీయ సీనియర్‌ 75 కిలోల్లో రజత పతకాన్ని కైవసం చేసుకున్నాడు. మిస్టర్‌ వరల్డ్‌ పోటీలకు సన్నద్ధమై, హాజరయ్యేందుకు తనకు ఆర్థిక స్థోమత లేదని 26 ఏళ్ల అయ్యప్ప ఆవేదన వ్యక్తం చేశాడు. ఇందుగ్గాను నెలకు రూ.30 వేల వంతున ఏడాదిపాటు తనకు ఆర్థిక సహాయాన్ని రాష్ట్ర ప్రభుత్వం అందించాలని శాట్స్‌ చైర్మన్‌ వెంకటేశ్వర్‌రెడ్డికి విజ్ఞప్తి చేశాడు.