ఖతార్‌లో ఉరి శిక్ష పడిన ఇద్దరు భారతీయులను రక్షించేందుకు కేంద్రం ప్రయత్నిస్తోంది. తమిళనాడుకు చెందిన అలగప్ప సుబ్రమణ్యం, చెల్లదురై పెరుమాళ్ ఉపాధి కోసం ఖతార్ వెళ్ళారు. అయితే అక్కడ ఓ మహిళను హత్య చేయడంతో ఖతార్ సుప్రీం కోర్టు వారిద్దరికి ఉరి శిక్ష, మరో నిందితుడు శివకుమార్‌కు 15 ఏళ్ళ జైలు శిక్ష విధించింది.
అయితే సుబ్రమణ్యం, పెరుమాళ్ క్షమాభిక్ష కోసం భారత రాయబార కార్యాలయం చేసిన ప్రయత్నాలు ఫలించలేదు. ఆ రెండు కుటుంబ సభ్యుల విన్నపంతో కేంద్ర విదేశాంగ మంత్రి సుష్మా స్వరాజ్ స్పందించారు. తమిళుల క్షమాభిక్ష కోసం ప్రయత్నిస్తున్నట్లు సోమవారం ఆమె ట్వీట్ చేశారు. దీని కోసం ఖతార్ నుంచి నివేదిక తెప్పించుకున్నామని, తమిళనాడు ప్రభుత్వం సహకరించాలని సుష్మా స్వరాజ్ కోరారు.