చెన్నై: గౌతంమేనన్‌, విక్రం కాంబినేషన్‌లో తెరకెక్కుతున్న కొత్త చిత్రం 'ధ్రువ నక్షత్రం'. ఈ సినిమా చిత్రీకరణకు ముందుగానే ఇటీవల ఫస్ట్‌లుక్‌ను విడుదల చేశారు. అజిత్‌ మాదిరిగానే సాల్ట్‌ అండ్‌ పెప్పర్‌ స్టెల్‌లో నటిస్తున్నారు విక్రం. అతిథిరావ్‌ను కథానాయికగా ఎంచుకున్నారు. రెండు రోజుల క్రితం హోసూరులో చిత్రీకరణ ఆరంభమైంది. నిజానికి ఈ సినిమా షూటింగ్‌ను కొడైక్కానల్‌లో నిర్వహించాలని అనుకున్నారు. కానీ హోసూరులో నిర్వహించారు. ఫిబ్రవరి అయిదు వరకు ఇక్కడ చిత్రీకరణ చేయనున్నారు. ఆ తర్వాత ఆరో తేదీ నుంచి విజయచందర్‌ దర్శకత్వంలోని సినిమాలో నటించనున్నారు విక్రం.
ఒకేసారి ఈ రెండు సినిమాలను పూర్తి చేయనున్నారు. ఆ తర్వాత హరి దర్శకత్వంలోని 'సామి 2'లో నటిస్తారు. గౌతంమేనన్‌ దర్శకత్వంలోని సినిమా కావడంతో విక్రం అభిమానులు 'ధ్రువ నక్షత్రం' కోసం ఎంతో ఆసక్తిగా ఎదురుచూస్తున్నారు.