షార్జా: షార్జా ఫైర్‌ఫైటర్స్‌, 300 కిలోల బరువున్న వ్యక్తిని రక్షించారు. బాల్కనీ డోర్స్‌ నుంచి ఆయన్ని ఫైర్‌ ఫైటర్స్‌ బయటకు తీసుకొచ్చారు. ఊబకాయంతో బాధపడుతున్న వ్యక్తి తక్షణం వైద్య చికిత్స కోసం అక్కడి నుంచి ఆసుపత్రికి వెళ్ళాల్సి ఉండగా, వెళ్ళలేని స్థితిలో పోలీసుల సహాయాన్ని అర్థించారు. షార్జా సివిల్‌ డిఫెన్స్‌ సమాచారం అందుకోగానే ఫైర్‌ ఫైటర్స్‌ని రంగంలోకి దించింది. ఏరియల్‌ లేడార్‌ సహాయంతో ఫైర్‌ఫైటర్స్‌ నాలుగో అంతస్తులో ఉన్న ఆ వ్యక్తిని బయటకు తీసుకురాగలిగారు. ఈ క్రమంలో బాధితుడికి ఎలాంటి గాయాలూ కాలేదని అధికారులు తెలిపారు. 90 నిమిషాలపాటు ఈ తతంగం నడిచింది. కిందకు దించగానే ఆ వ్యక్తిని అల్‌ ఖాసిమి ఆసుపత్రికి తరలించారు.