ఖతార్‌లోని ప్రముఖ షాపింగ్‌ మాల్స్‌, పార్కింగ్‌ ఫీజుల్ని పెంచే యోచనలో ఉన్నాయి. పార్కింగ్‌ లాట్స్‌ని కొందరు మోటరిస్టులు దుర్వినియోగం చేస్తుండడంతో ఈ ఆలోచన చేస్తున్నారు షాపింగ్‌ మాల్స్‌ నిర్వాహకులు. షాపింగ్‌ మాల్స్‌లో తమ వాహనాల్ని పార్క్‌ చేసేసి, వేరే పనుల నిమిత్తం వెళుతున్నవారి సంఖ్య పెరుగుతున్నట్లు తమ దృష్టికి రావడంతోనే ఈ ఆలోచన చేస్తున్నామని వారు చెప్పారు. ఖతార్‌ ఛాంబర్‌లో జరిగిన ట్రేడ్‌ అండ్‌ రీసెర్చ్‌ కమిటీలో ఈ అంశం చర్చకు వచ్చింది. పలు ఇతర అంశాల్ని కూడా ఈ సమావేశంలో షాపింగ్‌ మాల్స్‌ యాజమాన్యాలు చర్చించడం జరిగింది. మినిస్ట్రీ ఆఫ్‌ కామర్స్‌ - విజిటర్స్‌ కోసం నిర్ణయించిన పార్కింగ్‌ ఫీజులు తక్కువ ఉండటంతోనే ఈ దుర్వినియోగం జరుగుతోందని పలువురు ప్రస్తావించారు. షాపింగ్‌ మాల్‌ వినియోగదారులకు నిర్దేశిత ఫీజు వసూలు చేయడం, ఇతరులకు అదనంగా ఫీజులు వసూలు చేయడం మంచిదని వారు అభిప్రాయం వ్యక్తం చేశారు. ట్రేడ్‌ అండ్‌ రీసెర్చ్‌ కమిటీ - ఖతార్‌ ఛాంబర్‌ హెడ్‌ అదిల్‌ అబ్దుర్‌రహమాన్‌ అల్‌ మన్నాయ్‌ నేతృత్వంలో జరిగిన ఈ సమావేశానికి ఖతార్‌ టూరిజం అథారిటీ ప్రతినిథి కూడా హాజరయ్యారు.