న్యూదిల్లీ: మరికొద్ది రోజుల్లో ఆరంభంకానున్న ఇండియన్‌ ప్రీమియర్‌ లీగ్‌(ఐపీఎల్‌)-2017 కోసం రూపొందించిన థీమ్‌ సాంగ్‌ అభిమానులను ఎంతగానో ఆకట్టుకుంటోంది. తొమ్మిది లీగ్‌లను విజయవంతంగా పూర్తి చేసుకొని పదో సీజన్‌లో అడుగుపెడుతున్న సందర్భంగా ‘దస్‌ సాల్‌ ఆప్కే నామ్‌’ టైటిల్‌తో పాటను రూపొందించారు. బాలీవుడ్‌ సంగీత దర్శకులు సలీమ్‌-సులేమాన్‌ సంగీతం సమకూర్చగా బెన్నీ దాయల్‌ గానం అందించారు. సోనీమ్యాక్స్‌ ఈ వీడియోని ఫేస్‌బుక్‌లో షేర్‌ చేసింది. షేర్‌ చేసిన 48 గంటల్లోనే దాదాపు 25లక్షల మందికి పైగా ఈ వీడియోను వీక్షించడం విశేషం. థీమ్‌సాంగ్‌ ఆకట్టుకునేలా ఉండటంతో అభిమానుల నుంచి భారీ స్పందన వస్తోంది.
సోషల్‌ మీడియాలో ప్రస్తుతం ఈ వీడియో ట్రెండింగ్‌లో ఉంది. పదో సీజన్‌ వచ్చే నెల 5న అట్టహాసంగా హైదరాబాద్‌లోని ఉప్పల్‌ మైదానంలో ప్రారంభంకానుంది.