నకిలీ నోట్లని డాలర్స్‌గా మార్చేందుకు ప్రయత్నిస్తున్న ఇద్దరు వ్యక్తుల్ని పోలీసులు అదుపులోకి తీసుకున్నారు. దోహా క్రిమినల్‌ కోర్టులో ఈ కేసు విచారణ జరుగుతోంది. ఇటలీకి చెందిన ఓ వ్యక్తి, అలాగే బ్రిటన్‌కి చెందిన మరో వ్యక్తి నకిలీ నోట్లను చెలామణీ చేస్తూ దొరికిపోయారు. 500 ఖతారీ రియాల్స్‌ బ్యాంక్‌ నోట్స్‌ని వీరు నకిలీగా మార్చినట్లు అభియోగాలు మోపబడ్డాయి. అయితే తాము ఎలాంటి ఫోర్జరీకి పాల్పడలేదనీ తమ వద్ద ఉన్న నోట్లను డాలర్లలోకి మార్చాలనుకున్నామని వారంటున్నారు. 16,500 ఖతారీ రియాల్స్‌ విలువైన 500 ఖతారీ రియాల్స్‌ నోట్లను వీరు ఎక్స్‌చేంజ్‌ చేయబోయారు. అయితే విచారణలో అవి నకిలీ నోట్లు అని తేలింది. నకిలీ తయారీ కోసం వీరు వినియోగించిన సామాగ్రిని పోలీసులు స్వాధీనం చేసుకున్నారు.