షార్జాలో ఓ భవనం అగ్ని కీలల్లో చిక్కుకుపోయింది. నిర్మాణంలో వున్న ఈ భవనంలో గురువారం మధ్యాహ్నం అగ్ని ప్రమాదం సంభవించింది. నివాస భవనంగా మంటలు అంటుకున్న భవనాన్ని అధికారులు గుర్తించారు. అగ్నిమాపక సిబ్బంది ఘటనా స్థలానికి చేరుకుని, మంటల్ని ఆర్పే ప్రయత్నాల్లో ఉన్నారు. భవనం చుట్టూ పేరుకుపోయిన దట్టమైన పొగ, కిలోమీటర్ల దూరం నుంచే కనిపించింది. సమీపంలోని రోడ్లపై ట్రాఫిక్‌ ఇబ్బందులు తలెత్తాయి. ప్రమాద కారణాలు ఇంకా తెలియలేదు. ఎవరూ గాయపడినట్లుగానీ, మృతి చెందినట్లుగానీ తెలియరాలేదు. కింగ్‌ ఫైసల్‌ పరిసర ప్రాంతాల్లో ప్రజలు ఈ అగ్ని ప్రమాదంతో ఉలిక్కిపడ్డారు.

--సి.శ్రీ(దుబాయ్)