సింగపూర్‌: సింగపూర్‌ ఓపెన్‌ సూపర్‌ సిరీస్‌లో తెలుగుతేజం సాయి ప్రణీత్‌ సంచలనం సృష్టించాడు. ఆదివారం జరిగిన పురుషుల సింగిల్స్‌ ఫైనల్లో ప్రణీత్‌ విజయం సాధించి తన కెరీర్‌లో తొలి సూపర్‌ సిరీస్‌ టైటిల్‌ను సొంతం చేసుకున్నాడు.

హోరాహోరీగా సాగిన ఫైనల్‌ సమరంలో ప్రణీత్‌ 17-21, 21-17, 21-12 స్కోరుతో కిడాంబి శ్రీకాంత్‌ను ఓడించాడు. ప్రణీత్‌ తొలి గేమ్‌ కోల్పోయినా, వెంటనే పుంజుకుని రెండో గేమ్‌ను సొంతం చేసుకుని విజయావకాశాలను కాపాడుకున్నాడు. నిర్ణాయక చివరి, మూడో గేమ్‌తో పాటు మ్యాచ్‌ను కైవసం చేసుకుని విజేతగా నిలిచాడు. పలువురు క్రీడాకారులు, అధికారులు.. ప్రణీత్‌ను అభినందించారు.