దుబాయ్‌, యూఏఈ: కువైటీ దంపతులకు ఓ చిన్నారి కేవలం 22 వారాలకే జన్మించింది. సాధారణంగా ఈ వయసులో జన్మించే చిన్నారులు జీవించే అవకాశాలు అరుదు. అయితే పుట్టిన బిడ్డకు సరైన వైద్య సహాయం అందించడంతో ప్రస్తుతం బేబీ ఎదుగుదల బాగానే ఉందని వైద్యులు వెల్లడించారు. జులేకా ఆసుపత్రిలో జన్మించిన ఆ బేబీ పేరు నౌరా. కేవలం 600 గ్రాముల బరువుతో జన్మించింది ఈ చిన్నారి. జనవరి 30న ఈ బేబీ జన్మించగా, మూడు నెలలకు ఆమె బరువు 1.5 కిలోలుగా ఉంది. తల్లికి యూరిన్‌ ఇన్‌ఫెక్షన్‌ కారణంగా ఈ ముందస్తు జననం సంభవించింది. కువైట్‌ నుంచి సెలవుల కోసం వచ్చిన దంపతులు, అనుకోని ఇబ్బందుల్లో ఈ విధంగా ఇరుక్కున్నారు. స్పెషలిస్ట్‌ గైనకాలజిస్ట్‌ డాక్టర్‌ నాదా ఎల్‌షేక్‌, కన్సల్టెంట్‌ నియోనాటలజిస్ట్‌ డాక్టర్‌ మొహమ్మద్‌ నబీల్‌ ఖలాఫ్‌ సేఫ్‌ డెలివరీ విషయంలో చాకచక్యంగా, నేర్పుగా వ్యవహరించారు. ప్రత్యేకంగా బ్రీతింగ్‌ కోసం ఏర్పాట్లు చేశామని, మొదట్లో ఇబ్బందికర పరిస్థితులు తలెత్తుతాయని భావించినా అవసరమైన జాగ్రత్తలు తీసుకోవడంతో ప్రోగ్రెస్‌ బాగా లభించినట్లు వైద్యులు వెల్లడించారు.