ఆరునూరైనా అనంతపురం నుంచే వచ్చే ఎన్నికల్లో పోటీ చేస్తానని జనసేన అధ్యక్షుడు పవన్ కళ్యాణ్ చెప్పారు. త్వరలోనే అనంతపురంలో పాదయాత్ర నిర్వహిస్తానన్నారు. ప్రజా సమస్యల పరిష్కారం కోసం అవసరమైతే సినిమాల్లో నటించడం వాయిదా వేస్తానని.. తన తుది శ్వాస వరకూ ప్రజా సమస్యల పరిష్కారానికి పోరాటం చేస్తానని చెప్పారు.
తనను కొందరు పార్ట్ టైం పొలిటీషియన్ అంటున్నారని, అసలు పూర్తిగా రాజకీయాల్లో ఎవరున్నారన్నారని ప్రశ్నించారు. ఒక్కో నాయకుడు కోట్ల రూపాయలు ఆర్జించి ఇంట్లో కూర్చున్నారని, ఇంట్లోనే ఉండి రూ.కోట్లు సంపాదించే ఏర్పాట్లు చేసుకున్నారని పవన్ ఆరోపించారు. తాను మాత్రం తన కుటుంబం కోసం, తనపై ఆధారపడిన తన సిబ్బంది కోసం మాత్రమే సినిమాల్లో నటిస్తున్నానని చెప్పారు. జన సేనలో స్పీకర్స్, కంటెంట్‌ రైటర్స్, అనలిస్ట్ లుగా పనిచేసేందుకు ముందుకొచ్చిన అనంతపురం జిల్లాకు చెందిన దాదాపు 150మంది నూతన నాయకులతో పవన్‌ సమావేశమైన సందర్భంగా ఈ వ్యాఖ్యలు చేశారు.