షారుక్‌ ఖాన్‌కి తలైవా రజనీకాంత్‌ అంటే ఎంతో అభిమానం. అందుకే తాను నటించిన 'చెన్నై ఎక్స్‌ప్రెస్‌' చిత్రంలో 'లుంగి డ్యాన్స్‌'తో తలైవా కోసం ప్రత్యేక పాటను రూపొందించిన విషయం తెలిసిందే. అయితే ఇప్పుడు షారుక్‌ నటించనున్న ఓ చిత్రంలో ఏకంగా రజనీకాంతే అతిథి పాత్రలో మెరవనున్నారట.
షారుక్‌ ఖాన్‌, కబీర్‌ ఖాన్‌ కాంబినేషన్‌లో రానున్న కొత్త ప్రాజెక్ట్‌ 'శిద్యాత్‌'. ఇందులో షారుక్‌కి జోడీగా దీపిక పదుకొణెని ఎంపికచేసుకున్నారట. మరో విషయమేంటంటే.. ఈ చిత్రంలో తలైవాతో పాటు బాలీవుడ్‌ మెగాస్టార్‌ అమితాబ్‌ బచ్చన్‌ కూడా అతిథి పాత్రలో కనువిందు చేయనున్నట్లు బాలీవుడ్‌ వర్గాల సమాచారం. అంతేకాదు.. ఇందులో మన 'బాహుబలి' ప్రభాస్‌ కూడా గెస్ట్‌ రోల్‌లో సందడి చేయనున్నట్లు తెలుస్తోంది.
ఈ చిత్రాన్ని ఓ రొమాంటిక్‌ థ్రిల్లర్‌గా తెరకెక్కించనున్నారట. అయితే అతిథి పాత్రల గురించి చిత్రబృందం నుంచి అధికారికంగా ఎలాంటి సమాచారం లేదు. భారీ బడ్జెట్‌తో ఈ సినిమా తెరకెక్కించనున్నట్లు తెలుస్తోంది. డిసెంబర్‌లో చిత్రీకరణ ప్రారంభం కానుందట. అన్నీ అనుకున్నట్లు కుదిరితే నలుగురు సూపర్‌స్టార్లను ఒకే తెరపై చూడచ్చు.