జమ్మూ కశ్మీర్‌లోని కుల్గాం జిల్లాలో శనివారం ఉదయం నుంచి భద్రతా దళాలకు ఉగ్రవాదులకు మధ్య హోరాహోరీ కాల్పులు చోటుచేసుకున్నాయి. టాంట్రిపొరా ప్రాంతంలో కొనసాగుతున్న ఈ ఎన్‌కౌంటర్లో సైనికులు ఓ ఉగ్రవాదిని కాల్చి చంపారు. మృతిచెందిన ఉగ్రవాదిని మచివాకి చెందిన ఇస్ఫాక్ పద్దార్‌గా గుర్తించారు. కాగా శుక్రవారం పాకిస్తాన్ సైనిక మూకలు జమ్మూ కశ్మీర్‌లోని పూంచ్ సెక్టార్ వద్ద కాల్పుల విరమణ ఒప్పందాన్ని ఉల్లంఘించాయి. దీంతో నియంత్రణ రేఖ వద్ద పహారా కాస్తున్న బీఎస్ఎఫ్ జవాను ఒకరు ప్రాణాలు కోల్పోయినట్టు పోలీసులు వెల్లడించారు. ముస్లింలు పవిత్రంగా జరుపుకునే ఈద్-ఉల్-అధాకి సరిగ్గా ఒక్కరోజు ముందు పాకిస్తాన్ దళాలు కాల్పులకు తెగబడడం గమనార్హం.