బాలీవుడ్ కండల వీరుడు సల్మాన్ ఖాన్ కు అరుదైన గౌరవం లభించింది. బ్రిటిష్‌ పార్లమెంట్‌లో ఆయనకు 'గ్లోబల్‌ డైవర్సిటీ అవార్డు - 2017'ను అందజేశారు. ఓ నటుడిగా, నిర్మాతగా, గాయకుడిగా, బుల్లితెర వ్యాఖ్యాతగా చిత్ర పరిశ్రమకు సల్మాన్ చేసిన సేవలకుగానూ ఈ అవార్డును ప్రదానం చేసారు.

'సల్మాన్‌ ఖాన్‌ అందరికీ ఆదర్శం. ప్రపంచ వ్యాప్తంగా లక్షల మంది ప్రజల అభిమాన హీరో. సినిమాల విషయం పక్కన పెడితే.. ఆయన పరోపకారి. 'బీయింగ్‌ హ్యూమన్‌' అనే ఎన్జీవో ద్వారా నిరుపేదలకు సాయం చేశారు. ఆయనకు అవార్డు ప్రదానం చేయడం గౌరవంగా భావిస్తున్న ' అంటూ పార్లమెంట్‌ ఎంపీ కీత్‌వాజ్‌ ప్రశంసలు కురిపించారు. అవార్డు తీసుకున్న అనంతరం సల్మాన్‌ మాట్లాడుతూ..'నన్ను ఎంతగానో గౌరవించే, అభిమానించే అభిమానులకు ధన్యవాదాలు. నేను చాలా సినిమాలకు అవార్డులు తీసుకున్నా. కానీ వ్యక్తిగతంగా తీసుకున్న తొలి అవార్డు ఇది. చాలా సంతోషంగా ఉంది.' అంటూ తన ఆనందాన్ని వ్యక్త పరిచాడు.