తెలుగు ఇండస్ట్రీకి బ్రహ్మానందం లాంటి హాస్య నటుడు దొరకడం అదృష్టంగా చెప్పుకోవచ్చు. స్టార్ హీరోలకు తగ్గ రేంజ్‌లో తన పాత్రల్ని కూడా మలిచి దర్శకులు బ్రహానందాన్ని స్టార్ కమెడియన్‌ని చేశారు. జంధ్యాల అనే హాస్య చిత్ర శిల్పి చేతిలో అద్భుతంగా చెక్కబడిన హాస్యానందం బ్రహ్మానందం. 1985లోనే నట జీవితానికి శ్రీకారం చుట్టినా, తొలిసారి విడుదలయిన చిత్రం మాత్రం జంధ్యాల దర్శకత్వంలో వచ్చిన 'అహ నా పెళ్లంట'. తొలి సినిమాతోనే నట విశ్వరూపాన్ని ప్రదర్శించాడు. అప్పటి నుంచి దాదాపు ప్రతి సినిమాలో తన మార్కు కామెడీని పండిస్తూ ప్రేక్షకుల్ని కడుపుబ్బా నవ్విస్తూనే ఉన్నాడు.  అలాంటి అరుదైన వ్యక్తిని అనేక గౌరవ సత్కారాలు వరించాయి.  ఇప్పుడు అమెరికాలోని యూనివర్సిటీ ఆఫ్ వాషింగ్టన్ సౌత్ ఏషియా సెంటర్ ఆయన్ని ఘనంగా సత్కరించనుంది. ఈ నెల 6న సౌత్ ఏషియన్ ఫిలిం ఫెస్టివల్ అమెరికాలో జరగబోయే ఈ కార్యక్రమానికి ప్రత్యేక అతిధిగా బ్రహ్మానందాన్ని ఆహ్వానించారు.  ఈ సందర్భంగా బ్రహ్మానందాన్ని సత్కరిస్తారు.  1964లో జకార్తా చిత్రోత్సవంలో ఇలాంటి గౌరవం పొందిన గొప్ప నటుడు ఎస్వీ రంగారావు.  ఆ తరువాత ఆ అరుదైన గౌరవాన్ని దక్కించుకున్న నటుడు మన హాస్య బ్రహ్మ 'బ్రహ్మానందం'.  ప్రస్తుతం 'ఆచారి అమెరికా యాత్ర'లో నటిస్తూ అమెరికాలోనే ఉన్నారు.