ప్రముఖ విలాసవంతమైన వాహనాల తయారీ సంస్థ టెస్లా తన కంపెనీలో పనిచేస్తున్న సుమారు 400మందికి పైగా ఉద్యోగులకు ఉద్వాసన పలికింది. వీరిలో అసోసియేట్స్‌, బృంద నాయకులు, సూపర్‌వైజర్లు ఉన్నారని ఓ మాజీ ఉద్యోగి వెల్లడించారు. వార్షిక సమీక్ష అనంతరం ఈ నిర్ణయం తీసుకున్న టెస్లా.. ఈ మేరకు ఈ-మెయిల్‌ ద్వారా ప్రకటన వెలువరించింది. అయితే సంస్థ నుంచి ఎంతమందిని తొలగిస్తున్నదీ మాత్రం పేర్కొనలేదు. 'సుమారు 400 మంది ఉద్యోగులను కంపెనీ నుంచి తొలగించారు. ఇందులో అసోసియేట్స్‌ నుంచి టీమ్‌ లీడర్లు, సూపర్‌వైజర్ల వరకూ ఉన్నారు. అయితే వీరంతా ఎప్పుడు సంస్థను వీడతారనేది మాత్రం తెలియదు' అని పేరు చెప్పడానికి ఇష్టపడని మాజీ ఉద్యోగి ఒకరు తెలిపారు. అయితే టెస్లా మాత్రం ప్రతిభ ఆధారంగా చేసుకొని ఉద్యోగులను తొలగించినట్లు తెలుస్తోంది.