హైదరాబాద్‌: గృహిణులు కూడా మోడలింగ్‌ చేసి తమ సత్తాను చాటుకునేందుకు ఫిబ్రవరి 9 నుంచి శ్రీమతి తెలంగాణ పోటీలు జరుగనున్నాయి. బంజారాహిల్స్‌లోని హోటల్‌ సితార గ్రాండ్‌లో పోటీల గోడపత్రికను ఎమ్మెల్యే ఆర్‌ కృష్ణయ్య, స్పోర్ట్స్‌ అకాడమీ ఆఫ్‌ తెలంగాణ చైర్మన్‌ ఏ వెంకటేశ్వర్‌రెడ్డి, నగర మేయర్‌ సతీమణి బొంతు శ్రీదేవీ తదితరులు ఆవిష్కరించారు. ఫిబ్రవరి 9 నుంచి మార్చి 10 వరకు వి విధ జిల్లాలో పోటీలు జరుగుతాయని ఫైనల్స్‌ మార్చి 27న నిర్వహించనున్నట్టు నిర్వాహకురాలు లక్ష్మీ జగదీశ్వరి తెలిపారు. ఫామిలీ ఎమోషన్స్‌, ఉమెన్‌ ఇన్‌ సొసైటీ, డాన్సింగ్‌, సోషల్‌ రెస్పాన్సిబిలీటీ వంటి విభాగాల్లో 20 నుంచి 35 ఏళ్లలోపు గృహిణులకు పోటీలు జరుగుతాయన్నారు.