రజనీకాంత్‌ కోరుకుంటే... అగ్ర దర్శకులంతా ఆయన ఇంటి ముందు క్యూ కడతారు. సినిమాలు తీయడానికి పోటీ పడతారు. కానీ రజనీ ఆలోచనలు మారాయి. ఆయన యువ దర్శకులతో సినిమాలు చేయడానికి ఉత్సాహం చూపిస్తున్నారు. 'కబాలి', 'కాలా' రెండూ పా.రంజిత్‌తో పనిచేసిన చిత్రాలే. ఇప్పుడు మరో కుర్ర దర్శకుడికి ఛాన్స్‌ ఇచ్చారు. తనే... కార్తీక్‌ సుబ్బరాజు. తమిళనాట 'పిజ్జా'ని రూపొందించి అందరి దృష్టినీ ఆకర్షించారాయన. రెండో చిత్రం 'జిగడ్తాండ' కూడా విమర్శకుల్ని మెప్పించింది. తను రజనీ కోసం ఓ కథ సిద్ధం చేశాడు. అది తలైవాకి నచ్చింది. 'కాలా' తరవాత సెట్స్‌పైకి వెళ్లే చిత్రం ఇదే కావొచ్చు. రజనీ 'కాలా' ఏప్రిల్‌ 27న విడుదల కానుంది. ఆ తరవాత '2.ఓ' వస్తుంది. ఈలోగా కార్తిక్‌ సినిమా మొదలయ్యే అవకాశాలున్నాయి.