రైతు దేశానికి వెన్నుముక. అందరికీ అన్నం పెట్టే అన్నదాత. అలాంటి రైతన్న ప్రకృతి కన్నెర్ర జేసినా, నాయకులు కనికరించకపోయినా, పండించిన పంటకు గిట్టుబాటు ధర లభించకపోయినా ఆత్మహత్యే శరణ్యంగా భావిస్తాడు. రోజూ ఏదో ఒక మూల రైతు ఆత్మహత్య అన్న వార్తలు కంట తడి పెట్టిస్తాయి. అలాంటి రైతు పాత్రనే ప్రధానాంశంగా తీసుకుని నిజామాబాద్ జిల్లా మోతె గ్రామానికి చెందిన గంగారెడ్డి షార్ట్‌ఫిల్మ్ తీశాడు. లండన్‌లో ఎంబీఏ చేసిన గంగాధర్ అమెజాన్‌లో వచ్చిన ఉద్యోగాన్ని వదులుకుని మరీ కెమెరా పట్టుకున్నాడు. 

సొంతంగా రెండు యాడ్ ఫిల్మ్ చేశాడు. అవి లక్షల్లో లైకులని సంపాదించిపెట్టాయి. వాటి స్ఫూర్తితోనే మరో 4 నిమిషాల నిడివిగల 'మిస్సింగ్'ని తీసాడు. ఇందులో అన్నదాత దీన పరిస్థితిని ప్రధానాంశంగా తీసుకున్నాడు. సమాజం, ప్రభుత్వం రైతుల ఆత్మహత్యలను పట్టించుకోని పరిస్థితిలో ఓ మహిళా రైతు తన కొడుకు కోసం వెతుకుతుంటుంది. మా అబ్బాయి కనిపించడంలేదంటూ దారిన పోయే వాళ్లందర్నీ అడుగుతుంటుంది. ఈ చిన్ని చిత్రం ఎన్నో మనసులను ఆలోచింపజేస్తుంది. ప్రతి ఒక్కరినీ కంటతడి పెట్టిస్తుంది. ఫేస్‌బుక్‌లో ఇప్పటి వరకూ అరవై లక్షల మందికి పైగా వీక్షించారు. అందుకే న్యూజెర్సీ ఫిల్మ్ ఫెస్టివల్‌కు ఈ చిత్రం ఎంపికైంది.