రవిశాస్త్రి తెలుసు కాదా? అదేనండీ.. మాజీ క్రికెటర్‌, ప్రస్తుత టీమిండియా కోచ్‌. ఈ వయసులో అతనికి రేసింగ్‌ ట్రాక్‌పైన ఏం పని అని అనుకుంటున్నారా? అతను రేసింగ్‌ టీమ్‌ తరఫున బరిలో దిగుతున్నాడనుకుంటే మీరు తప్పులో కాలేసినట్టే. విషయం ఏంటంటే.. దాదాపు రెండు నెలల పాటు జరిగే ఇండియన్‌ ప్రీమియర్‌ లీగ్‌ జరగనున్న విషయం తెలిసిందే. టీమిండియా స్టార్ ఆటగాళ్లతో పాటు దేశవాళీ ప్లేయర్లు, విదేశీ ఆటగాళ్లు దాదాపు అందరూ ఏదో ఒక ఫ్రాంచైజీ తరఫున బరిలోకి దిగుతున్నారు.

ఈ నేపథ్యంలో భారత జాతీయ క్రికెట్ జట్టు కోచ్, సహాయసిబ్బందికి పూర్తి విరామం దొరికింది. ఊపరిసలపని షెడ్యూళ్లతో, తీరికలేని మ్యాచ్‌లతో ఎప్పుడూ బిజీగా ఉండే వీరంతా ప్రస్తుతం హాలీడేని ఎంజాయ్‌ చేస్తున్నారు. కాస్త.. విరామం లభించడంతో కోచ్‌ రవిశాస్త్రి బహ్రైన్ గ్రాండ్ ప్రి ఫార్ములావన్ రేస్‌ చూసేందుకు వెళ్లాడు. చాలా ఎంజాయ్ చేస్తున్నానని పేర్కొంటూ రవిశాస్త్రి ట్వీట్‌ చేశాడు. ఫొటోలను ట్విటర్ ద్వారా అభిమానులతో పంచుకున్నాడు.