దోహా: జనరల్‌ అథారిటీ ఆఫ్‌ కస్టమ్స్‌ ఇన్‌స్పెక్టర్స్‌, పెద్ద మొత్తంలో తంబాకు (నమిలే రకం పొగాకు)ని స్వాధీనం చేసుకున్నారు. ఖతార్‌లో ఈ తంబాకుపై నిషేధం అమల్లో వుంది. హమాద్‌ పోర్టులో దీన్ని స్వాధీనం చేసుకున్నారు అధికారులు. 2.8 టన్నుల తంబాకుని వాటర్‌ హీటర్లలో దాచి తరలిస్తుండగా అధికారులు అత్యంత చాకచక్యంగా దీన్ని పట్టుకోవడం జరిగింది. స్కానింగ్‌ డివైజ్‌ ద్వారా చెక్‌ చేస్తున్న సమయంలో అనుమానాస్పద పదార్థాలు వాటర్‌ హీటర్‌లో వున్నట్లు గుర్తించి, వాటిని కస్టమ్స్‌ అధికారులు వెలికి తీశారు. కస్టమ్స్‌ డిపార్ట్‌మెంట్‌ డైరెక్టర్‌ అబ్దుల్‌హైది అల్‌ సాహిల్‌, తమ ఇన్‌స్పెక్టర్స్‌ పనితీరుని ఈ సందర్భంగా ప్రశంసించారు. హమాద్‌ పోర్టులోనే ఈ నెలలో 12 టన్నుల తంబాకుని స్వాధీనం చేసుకోవడం జరిగింది.