పెద్ద సావిత్రికి ఎంత పట్టుదలో బుల్లి సావిత్రికి కూడా అంతే పట్టుదల. ఆ విషయం మహానటి సినిమాలో సావిత్రి తెలియజేసింది. మరి ఈ బుల్లి సావిత్రి కూడా తన నటన ద్వారా ప్రేక్షకుల మనసుల్ని దోచుకుంది. తన ముద్దు ముద్దు మాటలతో అందరినీ అలరించింది.  సావిత్రి పెద్దయ్యాక  ఆ పాత్రలో నటించిన కీర్తి సురేష్‌కి పేరు వచ్చినట్లే చిన్నారి సావిత్రి పాత్రకుగాను నటకిరీటి రాజేంద్ర ప్రసాద్ మనవరాలు నిశంకరకు కూడా అంతే పేరు వస్తోంది. ఓ ఇంటర్వ్యూలో ఈ విషయాన్ని వివరించింది. నిశంకరను ఈ సినిమాలో నీకు అవకాశం ఎలా వచ్చింది అని అడిగితే.. సినిమా డైరక్టర్ నాగ్ అశ్విన్ అంకుల్, నిర్మాత స్వప్న ఆంటీ తాతయ్యను కలవడానికి ఇంటికి వచ్చారు. అప్పుడు నేను మా పప్పీతో ఆడుకుంటున్నాను. తాతయ్యతో మాట్లాడుతున్న వారిద్దరినీ పప్పీతో భయపెట్టాను. నన్నూ చూసిన నాగ్ అంకుల్ మహానటిలో బుల్లి సావిత్రి పాత్రకు సరిగ్గా సరిపోతుందన్నారు. తాతయ్యను అడిగేసరికి వెంటనే ఒప్పేసుకున్నారు అంటూ చెప్పుకొచ్చింది. సినిమాలో భలే నటించావే.. బాగా అల్లరి చేస్తావనుకుంటా అని అంటే మా తాతయ్య ఇంట్లో ఎలా ఉంటారో నేను కూడా అలాగే ఉంటా. సినిమాలో కూడా అలాగే నటించా. ఆయన నటించిన సినిమాల్లోని కామెడీ సీన్స్, డైలాగ్స్ అన్నీ చెబుతుంటారు. అవి అన్నీ వింటూ, చూస్తూ నేర్చేసుకున్నా అని చెప్పింది. తాతకు తగ్గ మనవరాలు అన్న ప్రశంసల్ని అందుకుంటోంది నిశంకర.