మనామా:సల్మానియా మెడికల్‌ కాంప్లెక్స్‌ (ఎస్‌ఎంసి) వైద్యులు, అత్యంత క్లిష్టతరమైన సర్జరీని నిర్వహించి, కంటి నుండి అరుదైన ట్యూమర్‌ని తొలగించారు. డిపార్ట్‌మెంట్‌ ఆఫ్‌ ఆప్తల్మాలజీ మెడికల్‌ టీమ్‌ సర్జరీ వివరాల్ని వెల్లడించింది. 60 ఏళ్ళ బహ్రెయినీ పౌరుడి కుడి కన్ను కింది భాగం నుంచి ఈ ట్యూమర్‌ని తొలగించారు. బహ్రెయిన్‌లో ఈ తరహా సర్జరీ ఇదే తొలిసారి అని వైద్యుల బృందం పేర్కొంది. డాక్టర్‌ మొహమ్మద్‌ నయిమ్‌ నాజర్‌ (ఆప్తల్మాలజీ హెడ్‌, రెటినల్‌ సర్జరీ కన్సల్టెంట్‌) నేతృత్వంలో ఈ సర్జరీ జరిగింది. పేషెంట్‌ ఆసుపత్రికి వచ్చిన 48 గంటల్లోనే సర్జరీ నిర్వహించినట్లు వైద్య బృందం వివరించింది. రెండున్నర గంటలపాటు జరిగిన ఈ సర్జరీలో విజయవంతంగా ట్యూమర్‌ని తొలగించారు. సర్జరీ ఆలస్యమైతే ట్యూమర్‌ సైజ్‌ పెరిగి, కంటి చూపు కోల్పోయే ప్రమాదం ఏర్పడేదని వైద్యులు చెప్పారు. ట్యూమర్‌ ఏ తరహాదన్న విషయమై పరీక్షలు నిర్వహించేందుకోసం శాంపిల్స్‌ని సేకరించారు.