కోదాడ : తెలుగు సినీ రంగంలో ఎన్టీఆర్, ఏఎన్‌ఆర్‌తోపాటు ఆగ్రస్థానంలో వెలిగిన కథనాయకుడు, కత్తివీరుడు కాంతారావు బయోపిక్‌కు ప్రముఖ సినీ దర్శకుడు పీసీ ఆదిత్య శ్రీకారం చుట్టారు. కాంతారావు స్వగ్రామం సూర్యాపేట జిల్లా గుడిబండను ఆయన సందర్శించారు. కాంతారావు నివసించిన ఇంటిని పరిశీలించారు. కాంతారావు సమకాలికులతో ముచ్చటించి, పలు అంశాలను సేకరించారు. 250చిత్రాల్లో నటించిన ఆయన 100చిత్రాల్లో హీరోగా చేశారు. ఆయన బయోపిక్ తీయడం తన అదృష్టంగా భావిస్తున్నట్టు ఆదిత్య తెలిపారు. ఆయన జీవిత చరిత్ర సినిమాకు 'అనగనగా ఓ రాకుమారుడు' అనే పేరు నిర్ణయించిన్నట్టు పేర్కొన్నారు. జిల్లాలో ఆయనతో సాన్నిహిత్యం ఉన్న వారు, స్నేహితులు ఆయన బయోపిక్ తెలిపే ఫొటోలు పలు అంశాలను తెలియజేయాలనుకునే వారు తన (9705317188)ను సంప్రదించాలని ఆయన సూచించారు. త్వరలోనే ముహుర్తాన్ని నిర్ణయించి ఆయన వర్ధంతి వచ్చే ఏడాది మార్చి 22న సినిమాను పూర్తిచేసి ప్రేక్షకులకు అందించనున్నట్టు ఆయన తెలిపారు.