ప్రముఖ ఇన్‌స్టంట్‌ మెసేజింగ్‌ యాప్‌ వాట్సాప్‌ ఎప్పటికప్పుడు కొత్తకొత్త ఫీచర్లు ప్రవేశపెడుతూ యూజర్లని ఆకట్టుకుంటోంది. త్వరలో గ్రూప్ కాలింగ్, వాయిస్ కాలింగ్ ఫీచర్లు అందించనున్నట్టు గతేడాది అక్టోబర్‌లోనే తెలిపింది. ఈ ఏడాది మే నెలలో వాట్సాప్ ప్రధాన సంస్థ అయిన ఫేస్‌బుక్‌ తను యాన్యువల్‌ ఎఫ్‌8 డెవలపర్‌ కాన్ఫరెన్స్‌లో వాట్సాప్‌ గ్రూప్‌ కాలింగ్‌ ఫీచర్‌ను ప్రకటించింది. ఎప్పుడెప్పుడా అని వాట్సాప్ యూజర్లంతా ఆత్రుతగా ఎదురు చూస్తున్న అద్భుత ఫీచర్లు ఇవాళ అందుబాటులోకి వచ్చాయి. వాట్సాప్‌ గ్రూప్‌ వీడియో కాలింగ్‌ ఫీచర్‌లో వాయిస్‌, వీడియో రెండింటికీ సపోర్ట్‌ చేస్తుంది. దీంతో నలుగురు వాట్సాప్ యూజర్లు లైవ్‌గా గ్రూప్ వీడియో, వాయిస్‌ కాలింగ్ చేసుకోవచ్చు.
ఈ కొత్త ఫీచర్‌ ప్రపంచవ్యాప్తంగా ఉన్న ఐఓఎస్‌, ఆండ్రాయిడ్‌ యూజర్లందరికీ అందుబాటులోకి వచ్చినట్టు వాట్సాప్‌ ప్రకటించింది. వాట్సాప్ గ్రూప్ వీడియో, వాయిస్‌ కాలింగ్ ఫీచర్ కోసం.. ఈ యాప్‌ అప్‌డేటెడ్ వెర్షన్‌ను ఇన్‌స్టాల్ చేసుకోవాలి. గ్రూప్‌ వీడియో కాల్‌ చేయాలంటే, ముందు ఒక యూజర్‌తో వన్ టు వన్ వీడియో, వాయిస్‌ కాల్‌ ప్రారంభించాలి. ఆ తర్వాత పైన కుడివైపు ఉన్న యాడ్‌ పార్టిసిపెంట్‌ బటన్‌ నొక్కాలి. అలా ఇద్దరు యూజర్లను గ్రూప్‌ వీడియో/వాయిస్‌ కాల్‌కి యాడ్ చేయవచ్చు. తక్కువ నెట్‌వర్క్‌ ఉన్న పరిస్థితుల్లో కూడా ఈ కొత్త ఫీచర్‌ పనిచేస్తుంది. మెసేజెస్‌ మాదిరిగానే ఈ కాల్స్‌ కూడా ఎండ్‌-టూ-ఎండ్‌ ఎన్‌క్రిప్ట్‌ అయి ఉంటాయని వాట్సాప్ తెలియజేసింది.