ఫ్లోరిడా: అమెరికాలోని ఫ్లోరిడాకు చెందిన జాక్సన్‌విలేలో జరిగిన కాల్పుల ఘటనలో పలువురు మృతి చెందినట్లు తెలుస్తోంది. పోలీసులు తెలిపిన వివరాల ప్రకారం ఒక అనుమానితుడు కూడా మృతిచెందాడు. ఈ ఘటనలో ముగ్గురు మృతి చెందారని, 11 మంది తీవ్రంగా గాయపడ్డారని పోలీసులు చెబుతున్నారు. కాగా జాక్సన్ విలె కార్యాలయం ఒక ట్వీట్‌లో ఈ ఘటనకు సంబంధించిన వివరాలు తెలిపింది. 'ఈ కాల్పుల ఘటనలో చాలా మంది మృతి చెందారు. మరికొంతమందిని అక్కడి నుంచి తీసుకుపోయారు. సంఘటనా స్థలానికి అందరూ దూరంగా ఉండండి' అని పేర్కొంది. కాగా అక్కడి మీడియా తెలిపిన వివరాల ప్రకారం ఒక వీడియో గేమ్ టోర్నమెంట్‌లో ఈ కాల్పులు చోటుచేసుకున్నాయి. పోలీసులు సంఘటనా స్థలంలో మోహరించి దర్యాప్తు చేస్తున్నారు.