టెహ్రాన్‌: సిరియాలో శాంతి భద్రతల మెరుగుదల కోసం తాము అక్కడి ప్రభుత్వానికి మద్దతును ఇకపై కూడా కొనసాగిస్తామని ఇరాన్‌ రక్షణ మంత్రి అమీర్‌ హతామీ స్పష్టం చేశారు. సోమవారం ఆయన ఇక్కడ మీడియాతో మాట్లాడుతూ ఇరుదేశాల మధ్య సహకారాన్ని మూడో దేశం నిర్ణయించజాలదని స్పష్టం చేశారు. సిరియాలో ఇరాన్‌ జోక్యం పెరుగుతోందని ఆందోళన వ్యక్తం చేస్తున్న ఇజ్రాయిల్‌ తమ సరిహద్దుల వద్ద స్థావరం ఏర్పాటు చేసుకోవాలని ఇరాన్‌ ప్రయత్నిస్తోందని ఆరోపిస్తున్న విషయం తెలిసిందే. సిరియాలో రెండు రోజుల పర్యటనకు బయల్దేరుతున్న సమయంలో హతామీ ఈ వ్యాఖ్యలు చేశారు. ఈ పర్యటనలో ఆయన సిరియా అధ్యక్షుడు బషర్‌ అల్‌ అసద్‌, ఇతర సీనియర్‌ నేతలతో భేటీ అవుతారు.