మాడ్రిడ్‌: స్పెయిన్‌లో కొత్తగా ఏర్పడిన సెంటర్‌ లెఫ్ట్‌ ప్రభుత్వం సౌదీతో కుదుర్చుకున్న ఆయుధ విక్రయాల ఒప్పందాన్ని రద్దు చేయాలని నిర్ణయించింది. గతంలో కుదుర్చుకున్న ఆయుధ కొనుగోళ్ల ఒప్పందాల కింద సౌదీ అరేబియా చెల్లించిన 1.06 కోట్ల డాలర్ల నిధులను తిరిగి చెల్లించాలని నిర్ణయించింది. తాము విక్రయించిన ఆయుధాలను యెమెన్‌లో అమాయక ప్రజల ప్రాణాలు తీసేందుకు ఉపయోగిస్తున్నారని స్పెయిన్‌ ప్రధాని పెడ్రో శాంచెజ్‌ నేతృత్వంలో జరిగిన కేబినెట్‌ భేటీ ఆవేదన వ్యక్తం చేసింది. అమాయక ప్రజల ప్రాణాలు తీసేందుకు తమ ఆయుధాలను ఉపయోగించరాదన్న భావనతోనే తాము సౌదీకి ఆయుధ విక్రయ ఒప్పందాలను రద్దు చేసుకుంటున్నట్లు ప్రధాని శాంచెజ్‌ ప్రకటించారు.