పశ్చిమ్‌బంగ రాజధాని కోల్‌కతా నగరంలో భారీ అగ్నిప్రమాదం చోటుచేసుకుంది. అత్యంత రద్దీగా ఉండే బుర్రాబజార్‌ ప్రాంతంలోని బాగ్రీ మార్కెట్‌లో మంటలు చెలరేగాయి. ఆరంతస్తుల దుకాణ సముదాయంలో ఆదివారం తెల్లవారుజామున భారీగా మంటలు ఎగసిపడ్డాయి. ఘటనాస్థలికి చేరుకున్న 30 అగ్నిమాపక శకటాలతో మంటలను అదుపులోకి తెచ్చేందుకు తీవ్రంగా శ్రమిస్తున్నారు.

ఆ దుకాణ సముదాయంలో 400 దుకాణాలు ఉన్నట్లు తెలుస్తోంది. వీటిలో ఎక్కువగా ఫార్మా, నగల దుకాణాలు ఉన్నాయి. అయితే ప్రమాద సమయంలో ఆ భవంతిలో ఎవరూ లేకపోవడంతో ప్రాణనష్టం తప్పింది. 'తెల్లవారుజామున 2.45 నిమిషాలకు ప్రమాదం చోటుచేసుకుంది. భవంతిలోని అన్ని అంతస్తులకు మంటలు వ్యాపించాయి. మంటలు ఆర్పేందుకు సిబ్బంది తీవ్రంగా శ్రమిస్తున్నారు. ప్రమాదానికి గల కారణాలు ఇంకా తెలియరాలేదు' అని నగర మేయర్‌ తెలిపారు. అగ్ని ప్రమాదం నేపథ్యంలో ఆ ప్రాంతంలో వాహనాల రాకపోకలను పోలీసులు నిలిపివేశారు.