బాలీవుడ్ గాయకుడు నితిన్ బాలి మరణించారు. 'నా జానే' అంటూ సంగీత ప్రపంచంలోకి అడుగుపెట్టిన ఆయన 'నిలె నిలె అంబర్ పర్ ..' సాంగ్ రీమిక్స్ తో ఎంతో పేరు గడించారు. ఆయన భార్య ప్రముఖ టీవీ నటి రోమా బాలి. నిన్న రాత్రి రోడ్డు ప్రమాదంలో తీవ్ర గాయాలు పాలైన నితిన్ ఆసుపత్రిలో చికిత్స పొందుతూ నేటి ఉదయం మరణించారు. ముంబై, మాలాద్ నుండి బొరివిల్లి లో ఉన్న తన నివాసానికి వెళ్తున్న సమయంలో నితిన్ కారుకు ప్రమాదం జరిగింది. ఈ ప్రమాదంలో తలకు బాగా గాయాలయ్యాయి.

ప్రమాదం జరిగిన వెంటనే చికిత్స నిమిత్తం ఆసుపత్రికి తీసుకెళ్లాక గాయాలకు చికిత్స చేసి వైద్యులు డిశ్చార్జ్ చేశారు. కానీ ఇంటికి చేరుకున్నాక వెంటనే రక్తపు వాంతులు చేసుకోవటం, హార్ట్ రేట్ తీవ్రంగా పడిపోవటం జరిగాయని కుటుంబ సభ్యులు తెలిపారు. హుటాహుటిన మళ్ళీ ఆసుపత్రికి తరలించగా అప్పటికే వారు మృతిచెందినట్టు వైద్యులు నిర్దారించారు.