టోక్యో : అమెరికాను దూరంగా పెట్టి పదకొండు దేశాలు కలసి కుదుర్చుకున్న తాజా ట్రాన్స్‌ పసిఫిక్‌ వాణిజ్య ఒప్పందం ఆదివారం నుంచి అమల్లోకి వచ్చింది. అమెరికా ఉపసంహరించుకుంటున్నట్లు ప్రకటించాక ప్రపంచ ఆర్థిక వ్యవస్థలో పదవ వంతు ప్రాతినిధ్యం వహిస్తున్న 11 దేశాలు కలసి గత మార్చిలో ఈ వాణిజ్య ఒప్పందాన్ని కుదుర్చుకున్న సంగతి తెలిసిందే. ట్రాన్స్‌ పసిఫిక్‌ ఏరియాలో సభ్య దేశాలు తమ మధ్య స్వేచ్ఛా వాణిజ్యం సాగించేందుకు ఈ ఒప్పందం వీలు కల్పిస్తుంది. కీలక రంగాలకు సంబంధించిన 95 రకాల వస్తువుల దిగుమతులపై సుంకాలను పూర్తిగా తొలగిస్తారు. వరి, బీఫ్‌ వంటి వాటిపై కొంత నియంత్రణ ఉంటుంది. అమెరికా అనుసరిస్తున్న రక్షణాత్మక చర్యలు (ప్రొటెక్షనిజం), చైనాపై అది సాగిస్తున్న వాణిజ్య యుద్ధం దరిమిలా ఆసియా పసిఫిక్‌ భాగస్వామ్య ఒప్పందం ప్రాధాన్యత సంతరించుకుంది. ఆస్ట్రేలియా, కెనడా, జపాన్‌, మెక్సికో, న్యూజిలాండ్‌ సింగపూర్‌ మొదట ఈ ఒప్పందానికి ఆమోదం తెలపగా, తరువాత వియత్నాం మరి కొన్ని దేశాలు ఇందులో వచ్చి చేరాయి.