షార్జా ఇంటర్నేషనల్‌ ఎయిర్‌ పోర్ట్‌ వద్ద '24 హవర్‌ పాస్‌పోర్ట్‌ ఆఫీస్‌'ని ప్రారంభించారు. ఈ కార్యాలయంలో యూఏఈ జాతీయులు తమ ఎక్స్‌పైర్డ్‌ పాస్‌పోర్టుల్ని నిమిషాల్లోనే రెన్యువల్‌ చేసుకోవడానికి వీలుంది. రోజులో ఇరవై నాలుగు గంటలూ ఈ సర్వీస్‌ని వినియోగించుకోవడానికి ఈ కార్యాలయం అవకాశం కల్పిస్తుంది. షార్జా డిప్యూటీ రూలర్‌, క్రౌన్‌ ప్రిన్స్‌ షేక్‌ సుల్తాన్‌ బిన్‌ మొహమ్మద్‌ బిన్‌ సుల్తాన్‌ అల్‌ కాసిమి ఈ కార్యాలయాన్ని ప్రారంభించారు. జిడిఆర్‌ఎఫ్‌ఎ ఎగ్జిక్యూటివ్‌ డైరెక్టర్‌ బ్రిగేడియర్‌ ఆరిఫ్‌ అల్‌ షామ్షి మాట్లాడుతూ, యూఏఈ సిటిజన్స్‌ కోసం ఈ కార్యాలయాన్ని ప్రారంభించినట్లు చెప్పారు. కొత్త పాస్‌పోర్ట్‌ ఫొటో, రెన్యువల్‌ ఫీజు చెల్లిస్తే, నిమిషాల వ్యవధిలోనే పాస్‌పోర్ట్‌ రెన్యువల్‌ అవుతుందని ఆయన వివరించారు. ప్రతి ఒక్కరూ తమ పాస్‌పోర్ట్‌ ఆరు నెలల సమయం వరకు గడువు వుందో లేదో చూసుకోవాలని ఆయన విజ్ఞప్తి చేశారు.