భారతీయ వలసదారుడొకరు మాల్కియాలోని వర్క్‌ ప్లేస్‌లో బలవన్మరణానికి పాల్పడ్డారు. మృతుడ్ని 48 ఏళ్ళ రామ్‌ ప్రతాప్‌ సింగ్‌గా గుర్తించారు. భారతదేశంలోని ఉత్తరప్రదేశ్‌ నుంచి వచ్చినట్లుగా అతని గురించిన వివరాల్ని అధికారులు పేర్కొన్నారు. మృతుడికి భార్య అనితా సింగ్‌, ముగ్గురు పిల్లలు వున్నారు. ఓ ప్రైవేటు కాంట్రాక్టింగ్‌ కంపెనీలో మృతుడు వర్క్‌ సూపర్‌ వైజర్‌గా పనిచేస్తున్నారు. ముహరాక్‌లో నివసిస్తున్న సింగ్‌ తన కుమార్తెల్ని ఇంటి వద్ద వదలి, రాత్రి సమయంలో ఈ దారుణానికి పాల్పడ్డారు. తన తండ్రి ఆచూకీ కోసం ఆయన కుమార్తెలు సాక్షి, శ్రేయ సింగ్‌ ప్రయత్నించగా, కో-వర్కర్‌, రామ్‌ ప్రతాప్‌ సింగ్‌ మృతి విషయాన్ని వెల్లడించారు. సాక్షి, శ్రేయ, ఇండియన్‌ స్కూల్‌ బహ్రెయిన్‌లో విద్యనభ్యసిస్తున్నారు. రామ్‌ ప్రతాప్‌ సింగ్‌ కుమారుడు క్యాన్సర్‌తో బాధపడుతున్నాడు. భారతదేశంలో చికిత్స పొందుతున్న ఆ కుర్రాడికి సహాయంగా అతని తల్లి ఇండియాలోనే వుంది. ఈ క్రమంలో సింగ్‌ బలవన్మరణానికి పాల్పడటం బాధాకరం. చనిపోయే ముందు ప్రతాప్‌ సింగ్‌ తన కుమార్తెలకు 200 బహ్రెయినీ దినార్స్‌ ఇచ్చాడు.