అమెరికా తూర్పు ప్రాంతంలోని 39 రాష్ట్రాల్లో మంచు తీవ్రంగా కురుస్తోంది. డెట్రాయిట్, చికాగో, ఫిలడెల్ఫియా, న్యూయార్క్, వాషింగ్టన్ రాష్ట్రాల్లో గత రాత్రి భారీగా మంచుకురిసినట్లు వాతావరణ శాఖ అధికారులు తెలిపారు. దీని ప్రభావంతో చాలా పట్టణాల్లో పాఠశాలలు, కార్యాలయాలు మూతపడ్డాయి. వాషింగ్టన్ లో 7వందలవిమానాలు, చికాగోలో 2వందలు రద్దైనట్లు అధికారులు తెలిపారు. ఫిలడెల్ఫియాతోపాటు మధ్య రాష్ట్రాల్లోని విమానాశ్రయాల్లోను విమానాల రాకపోకలకు తీవ్ర అంతరాయం ఏర్పడినట్లు వెల్లడించారు. మిన్నెపోలీస్, వాషింగ్టన్, ఫిలడెల్ఫియాలో అధికారులు ముందు జాగ్రత్తగా వాహనాల రాకపోకలపై ఆంక్షలు విధించారు. మంచు కారణంగా దాదాపు 2 మిలియన్ల మంది ప్రజలు తీవ్ర ఇబ్బందుకు గురవుతున్నారని తెలిపారు. జనం ఇళ్లలోంచి బయటకు వచ్చేందుకే జంకుతున్నారు. మరికొద్దిరోజుల పాటు వాతావరణం ఇలానే ఉండే అవకాశం ఉందని వాతావరణ అధికారులు తెలిపారు.