యూ.ఏ.ఈ:14 ఏళ్ళ ఎమిరేటీ బాలిక కారుని అతివేగంగా నడుపుతూ రోడ్డు ప్రమాదానికి గురై ప్రాణాలు కోల్పోయింది. అల్‌ హారేలో ఈ ప్రమాదం చోటు చేసుకుంది. అతి వేగంతో దూసుకొచ్చిన కారు సిమెంట్‌ బ్యారియర్‌ని ఢీకొనడంతో పల్టీలు కొట్టిందని ప్రత్యక్ష సాక్షులు తెలిపారు. ప్రమాదంలో తీవ్రంగా గాయాల పాలైన బాలికను ఖోర్‌ ఫక్కాన్‌ హాస్పిటల్‌కి తరలించగా, అక్కడ ఆమె ప్రాణాలు కోల్పోయింది. సమాచారం అందుకోగానే సంఘటనా స్థలానికి ట్రాఫిక్‌ అధికారుల టీమ్స్‌, పెట్రోల్స్‌, అంబులెన్స్‌ చేరుకున్నాయనీ ఈస్టర్న్‌ రీజియన్‌ పోలీస్‌ డైరెక్టర్‌ కల్నల్‌ అలి అల్‌ కాయ్‌ అల్‌ హమ్మౌది చెప్పారు. తల్లిదండ్రులకు తెలియకుండానే ఆ బాలిక కారుని నడిపినట్లు తెలుస్తోంది. ఇలాంటి విషయాల్లో తల్లిదండ్రులు జాగ్రత్తగా వ్యవహరించాలని సూచిస్తూ, బాలిక మృతి పట్ల ప్రగాఢ సంతాపం వ్యక్తం చేశారు కల్నల్‌ అలి అల్‌ కాయ్‌ అల్‌ హమౌది.