కువైట్‌ సిటీ: కోర్ట్‌ ఆఫ్‌ కాస్సాషన్‌, లోవర్‌ కోర్టు తీర్పుని సమర్థిస్తూ ఓ కేసులో నిందితుడికి ఉరిశిక్షను ఖరారు చేసింది. నిందితుడు హెరాయిన్‌ని దేశంలోకి తెచ్చి విక్రయిస్తున్నట్లు అభియోగాలు మోపబడ్డాయి. ఎరైవల్స్‌ హాల్‌ వద్ద నిందితుడ్ని గుర్తించిన కస్టమ్స్‌ అధికారులు అతని నుంచి రెండు బ్యాగ్‌లలో వున్న హెరాయిన్‌ని స్వాధీనం చేసుకున్నారు. వ్యక్తిగత అవసరాల కోసం ఆ డ్రగ్‌ని తీసుకొచ్చినట్లు నిందితుడి తరఫు న్యాయవాది చేసిన వాదనల్ని న్యాయస్థానం తోసిపుచ్చింది. దేశంలో విక్రయించేందుకే స్మగ్లింగ్‌ చేస్తున్నట్లు నిందితుడిపై అభియోగాలు రుజువయ్యాయి. ఈ నేపథ్యంలో నిందితుడికి న్యాయస్థానం మరణ శిక్ష విధిస్తూ తీర్పు వెల్లడించింది.