షార్జాలో రిక్రియేషనల్‌ ఫిషింగ్‌కి సంబంధించి కీలకమైన నిర్ణయాలు వెలువడ్డాయి. క్రౌన్‌ ప్రిన్స్‌, షార్జా డిప్యూటీ లీడర్‌, షార్జా ఎగ్జిక్యూటివ్‌ కౌన్సిల్‌ ఛైర్మన్‌ అయిన షేక్‌ మొహమ్మద్‌ బిన్‌ సుల్తాన్‌ అల్‌ కాసిమి నేతృత్వంలో కీలకమైన నిర్ణయాలు తీసుకున్నారు. ఫిషింగ్‌కి సంబంధించి కొన్ని నిబంధనల్ని విధించారు. ఫిషింగ్‌ కోసం దరఖాస్తు చేసుకునేవారు వారం రోజులకుగాను 30 దిర్హామ్‌లు ఫీజు చెల్లించాలి. నెల రోజులకు 100 దిర్హామ్‌లు, సంవత్సరానికి 250 దిర్హామ్‌లు చెల్లించాల్సి వుంటుంది. అదే ఫ్యామిలీ పర్మిట్‌ విషయానికొస్తే, వారానికి 50 దిర్హామ్‌లు, నెలకి 150 దిర్హామ్‌లు, ఏడాదికి 400 దిర్హామ్‌లు చెల్లించాలి. దరఖాస్తు చేసుకునే వ్యక్తి ఎమిరేటీ పౌరుడు లేదా షార్జా ఇచ్చే రెసిడెన్స్‌ పర్మిట్‌ని కలిగి వుండాలి. బీచ్‌లలో ఎట్టి పరిస్థితుల్లోనూ చెత్తను వదిలి వెళ్ళరాదు. కమిషన్స్‌ ఇన్‌స్పెక్టర్‌కి సహకరించాల్సి వుంటుంది.