ప్రపంచవ్యాప్తంగా విస్తరించిన కరోనా వైరస్‌(కొవిడ్‌-19) సామాన్యులతో పాటు వీఐపీలు, దేశాల మంత్రులనూ వదలట్లేదు. ఇప్పటికే ఇరాన్‌లో ఎంపీలకు, మంత్రులను సోకిన వైరస్ తాజాగా బ్రిటన్‌ ఆరోగ్యశాఖ ఉపమంత్రి నాడీన్‌ డోరిస్‌కు సంక్రమించింది. ఈ విషయం ఆమే స్వయంగా ప్రకటించారు. తనకు తాను స్వీయ నిర్బంధంలోకి వెళుతున్నాని వెల్లడించారు. గత శుక్రవారం కరోనా వైరస్‌ నియంత్రణకు సంబంధించిన ఓ ఫైల్‌పై సంతకం చేస్తున్న సమయంలో ఆమె తొలిసారి అస్వస్థతకు గురయ్యారు. ఆ తర్వాత ఆమె పలువురు ఉన్నతాధికారులు, నాయకులను కలిసినట్లు సమాచారం. దీంతో అప్రమత్తమైన అధికారులు వారందర్నీ గుర్తించే పనిలో పడ్డారు. ఆమె కలిసిన వారిలో ప్రధాని బోరిస్‌ జాన్సన్‌ కూడా ఉన్నట్లు తెలుస్తోంది. ఇప్పటి వరకు బ్రిటన్‌లో వైరస్‌ బారిన పడి ఆరుగురు మృతి చెందారు. మరో 373 మందికి ఈ మహమ్మారి సోకింది.